Kujtimet e diplomatëve lexohen me kërshëri, sepse njerëzve jashtë fushës së diplomacisë, jeta e diplomatëve u duket e mistershme. Autori e zgjidh këtë mister. Ky libër është si një dritare për profesionin e diplomatit, dhe jo vetëm. Ai është një libër me kujtime, jep detaje, informacione kulturore dhe përcjell emocione të sinqerta. Autori,  duke shpjeguar rutinat profesionale, praktikat,  normat kulturore, na prezanton një anë të panjohur për njerëzit jashtë diplomacisë. Libri mbështet idenë se në sajë të diplomacisë vende të caktuara rrojnë në harmoni me pjesën tjetër të botës dhe se pa diplomaci dhe pa diplomatë shumë nga punët e kësaj bote nuk do të kryheshin.