Për herë të parë në shqip vjen libri Erwin Schrodinger dhe Revolucioni Kuantik, shkruar nga John Gribbin dhe përkthyer nga Eva Dyrnjaja. Erwin Schrödinger ishte një fizikan austriak, i famshëm për kontributin e tij në fizikën kuantike. Ai fitoi Çmimin Nobel në vitin 1933 dhe njihet më së shumti për eksperimentin e ‘maces në kuti’, e cila, në të njëjtën kohë, ishte e gjallë dhe e ngordhur, gjë që zbulon natyrën paradoksale të mekanikës kuantike. Shrëdingeri punoi në periudhën më të begatë në të gjithë historinë e shkencës. Në vitin 1906, në kohën kur ai nisi studimet universitare, Ajnshtajni kishte publikuar ndërkohë punimin e tij revolucionarizues për teorinë e relativitetit. Tashmë stafeta e progresit shkencor po i pasohej një brezi të ri: werner Heisenberg-ut, Pol Dirak-ut, Nils Bohr-it dhe vetë Schrödinger-it. Në këtë biografi që të mbërthen, John Gribbin na çon në zemër të revolucionit kuantik. Ai na tregon historinë e jetës plot ngjyra të Schrödinger-it. Me një stil interesant dhe të thjeshtë për t’u kuptuar, ai arrin të shpjegojë botën mahnitëse të mekanikës kuantike, që është në themel të të gjithë shkencës moderne.