Studimi i ri ngre alarmin: ChatGPT ul aktivitetin e trurit te studentët!

🧠 Një studim i ri nga MIT Media Lab ngre alarmin se përdorimi i ChatGPT mund të zvogëlojë aktivitetin e trurit, sidomos te studentët. Hulumtimi, i kryer mbi 54 pjesëmarrës të moshës 18-39 vjeç nga zona e Bostonit, i ndau ata në tre grupe: një që përdorte ChatGPT, një që kërkonte informacion me Google Search dhe një tjetër që punonte pa asnjë ndihmë teknologjike.

Aktiviteti i trurit i të gjithë pjesëmarrësve u monitorua me EEG gjatë hartimit të përmbajtjeve. Rezultatet ishin shqetësuese: grupi që përdori ChatGPT tregoi aktivitet më të ulët neurologjik, performancë më të dobët gjuhësore dhe më pak përfshirje njohëse. Shumica prej tyre thjesht kopjonin tekstet e gjeneruara nga AI, pa reflektuar thellë mbi to.

Ndërkohë, grupi që punoi pa ndihmë teknologjike shfaqi aktivitet më të lartë në zona të trurit të lidhura me kujtesën dhe kreativitetin. Edhe grupi që përdori Google, ndonëse kishte një mjet ndihmës, tregoi angazhim më të madh mendor dhe një proces më aktiv të të menduarit.

Ky studim tregon qartë se, ndonëse mjetet si ChatGPT janë të dobishme, ato mund të ulin ushtrimin e mendimit të pavarur nëse përdoren pa masë.