Studim i ri: Fëmijët po i rikthehen leximit, rritja e parë që nga viti 2021!

Për herë të parë që nga viti 2021, leximi në kohën e lirë te fëmijët ka shënuar rritje. Sipas një studimi të ri të “National Literacy Trust” në Mbretërinë e Bashkuar, 36.1% e fëmijëve dhe të rinjve të moshës 8–18 vjeç deklarojnë se u pëlqen të lexojnë në kohën e lirë, krahasuar me 32.7% një vit më parë.

Në rritje është edhe leximi i përditshëm, i cili ka kaluar nga 18.7% në 20.3%. Studimi përfshin më shumë se 125 mijë fëmijë dhe të rinj dhe bazohet në Anketën Vjetore të Shkrim-Leximit, e cila zhvillohet çdo vit që nga viti 2010.

Raporti thekson se, pas disa viteve rënieje, është vërejtur një përmirësim i rëndësishëm si në kënaqësinë e leximit ashtu edhe në leximin e përditshëm. Sipas studiuesve, fëmijët që lexojnë më shpesh kanë më shumë gjasa ta shohin leximin si një mbështetje për të nxënit, mirëqenien dhe kuptimin e vetes dhe të të tjerëve.

Të dhënat tregojnë gjithashtu dallime mes vajzave dhe djemve. Në vitin 2026, 42.3% e vajzave deklaruan se e shijojnë leximin në kohën e lirë, kundrejt 28.8% të djemve. Edhe leximi i përditshëm është më i lartë te vajzat (23.1%) sesa te djemtë (16.8%).

Megjithatë, raporti nënvizon se edhe shumë të rinj që nuk e konsiderojnë veten lexues të pasionuar vazhdojnë të lexojnë dhe të gjejnë vlerë në librat dhe tekstet që lexojnë.