93 vjet nga ndarja nga jeta e John Galsworthy-t, shkrimtari që preku zemrat e mbarë botës me “Lulet e Mollës”!

John Galsworthy është ai shkrimtar që, me mjeshtërinë e rrallë të fjalës, të mban të mbërthyer faqe pas faqe, derisa pa e kuptuar zhytesh në një botë tjetër.

Ai u nda nga jeta më 31 janar 1933 dhe mbetet një nga autorët më të mëdhenj anglezë të shekullit XX, një zë i fuqishëm i ndërgjegjes njerëzore dhe fitues i Çmimit Nobel për Letërsi në vitin 1932.

I lindur në një familje të pasur tregtare, Galsworthy u formua si jurist dhe ushtroi profesionin e avokatit. Por përtej kësaj rruge të sigurt dhe të respektuar, rrihte thirrja e tij e vërtetë: letërsia. Përmes veprave të tij, ai u bë mbrojtës i kauzave humane, duke ngritur zërin për të drejtat e grave, për mbrojtjen e kafshëve dhe për një shoqëri më të drejtë e më njerëzore.

Kush e ka lexuar “Lulet e Mollës” e kupton më së miri thellësinë e këtij shkrimtari. Ky libër është një meditim i qetë, por i fuqishëm, mbi jetën dhe mëkatin, mbi çastet e papritura që e ndryshojnë njeriun përgjithmonë. Me një stil të përmbajtur dhe të përsosur, Galsworthy na kujton se edhe në ngjarjet më të zakonshme fshihen transformime të mëdha, që mbartin mesazhe të thella për dashurinë, humbjen dhe brishtësinë e shpirtit njerëzor.